場外逼滿Fans聽漏音 阿信：冠佑說1人收100元

台灣天團五月天嘅「人生無限公司」巡迴演唱會，喺歷時近兩年於世界巡迴後，今晚喺台中舉行最終場，佢哋今晚6點半準時開騷，以《派對動物》、《傷心的人別聽慢歌》等歌揭開序幕，全場25,000名觀眾報以熱烈嘅歡呼聲。由於五月天啲飛一票難求，有唔少撲唔到飛嘅fans喺場外聽漏音，阿信笑住話「其實冠佑想出去收門票，每個人酌收50元（新台幣，下同）就好。」跟住佢叫場內fans唔好出聲，測試外圍fans係咪聽到場內音，阿信大叫「外面的朋友」，果然傳嚟歡呼聲，o氹得五月天好開心，跟住阿信再話：「冠佑說你們1人收100元。」即刻鴉雀無聲，怪獸即笑言：「疏散效率史上最快。」

由於今晚係最後一場，五月天都落力演出，仲話因為聽日唔使「上班」，今晚就可以盡情「加班」，唱晒所有喺歌單上，甚至唔喺歌單上嘅歌。而大會又安排咗喺網上直播一小段，其中阿信唱出《倔強》等歌曲時，全場大合唱，場面非常感動。嗰段限時直播吸引逾13萬fans捧場。